रुँदैरुँदै आफ्नै किताब जलाए चिन्तनले

अधिवक्ता गोपाल सिवाकोटी चिन्तनद्वारा हालै बजारमा ल्याइएको पुस्तक गोरखा आन्दोलन उपलब्धि र चुनौतीमा उर्मिला पुलामीमगरको व्यक्तिगत चरित्रहत्या गरिएकोमा मगर समुदायले विरोध गरेपछि चिन्तनले सबै पुस्तक नष्ट गर्ने भएका छन् । नेपाल मगर विद्यार्थी संघको पहलमा शनिबार भएको सहमति अनुसार चिन्तनले तीन दिनभित्रमा सबै पुस्तक बजारबाट उठाई नष्ट गर्ने छन् । पुस्तक एकहजार प्रति छापिएको थियो । सहमतिको पहिलोचरणमा शनिबारै चिन्तनले ३५० प्रति पुस्तक बागबजार र खुलामञ्चमा जलाएका छन् । आफूले लेखेको पुस्तक आफ्नै हातले जलाउनु पर्‍यो भन्दै चिन्तन पुस्तक जलाउने बेलामा रोएका थिए । पुस्तकको मूल्य ३०० रुपियाँ राखिएको छ । बिहान ८ बजेदेखि शुरु भएको वार्ता करिब छ घण्टापछि मात्र सहमतिमा पुगेको थियो । छ बुँदे सहमतिपत्रमा उर्मिला पुलामीमगरको व्यक्तिगत तथा चरित्रहत्या सम्बन्धमा आजसम्म गोपाल सिवाकोटी चिन्तनले लेखेका र प्रकाशन गरेका विषयबाट उर्मिला र उनको परिवारमा पर्न गएको क्षतिप्रति चिन्तनले लिखित र सार्वजनिक रुपमा माफी माग्ने उल्लेख छ । यस्तै चिन्तनद्वारा लिखित तथा बि्रटिश गोरखा दासत्व विरुद्ध अभियान नामक संस्थाद्वारा प्रकाशित गोरखा आन्दोलन उपलब्धि र चुनौती नामक पुस्तकको सम्पूर्ण प्रतिहरु तीनदिनभित्र नष्ट गर्ने, अब आउने दिनहरुमा सो पुस्तकको प्रकाशन तथा विक्रीवितरण नगर्ने सहमति भएको छ । उर्मिला मगरको बारेमा लेख्य, श्रब्यदृश्य सामग्रीहरु कहिँ कतै कसैलाई प्रदान नगर्ने र तिनीहरुलाई पनि तीनदिनभित्र नष्ट गर्ने, अब उप्रान्त उर्मिलाको चरित्रहत्या सम्बन्धमा गोपाल सिवाकोटी चिन्तनद्वारा कहिँ कतै कुनै प्रकारको लेख, वक्तव्य बाहिर नल्याउने पनि सहमति भएको छ । उर्मिलाको व्यक्तिगत र पारिवारिकलाई चरित्र हत्याबाट पुगेको पीडाको क्षतिपूर्ति उर्मिलाको परिवार र गोपाल सिवाकोटीसँग छलफल गरी तय गर्ने पनि निधो भएको छ । सहमतिहरु पालना नगरेमा चिन्तनलाई आवश्यक सामाजिक र कानुन कारबाही गरिने सहमतिमा चिन्तनले हस्ताक्षर गरेका छन् । सहमति पत्रमा नेपाल मगर विद्यार्थी संघका अध्यक्ष भोजविक्रम बुढामगर, सल्लाहकारहरु बमकुमारी बुढामगर, अधिवक्ताद्वय गौबहादुर आलेमगर र इन्दिरा श्रीशमगर, सभासद् तथा नेपाल आदिवासी जनजाति महासंघका महासचिव रामबहादुर थापामगर, नेपाल मगर संघको उपाध्यक्ष नविन रोकामगर, नेपाल मगर महिला संघकी पूर्णमाया पुलामीमगर र गोपाल सिवाकोटी चिन्तनले हस्ताक्षर गरेका छन् । चिन्तनले उर्मिलालाई आफ्नी पूर्व प्रेमिका भएको दाबी गर्दै उर्मिलाको अर्कैसित विवाह भएपछि उनको बारेमा विभिन्न पत्रिका, पुस्तक, इमेल, इन्टरनेटमा प्रचारवाजी गर्दै आएका थिए ।