शहीद गेटमा प्रथम शहीद लखन थापा

प्रथम शहीद लखन थापामगरको तस्वीर शहीद गेटमा राखिएको छ ।
प्रथम शहीद लखन थापा मगरले शहादत प्राप्त गरेको १३२ वर्षछि उनका शुभेच्छुकहरुले शुक्रबार मध्यान्ह शहीद गेटमा तस्वीर राखेका हुन् ।
लखन थापामगरको १३२ औँ स्मृति दिवसको अवसर पारेर सो तस्वीर राखिएको नेपाल मगर विद्यार्थी संघका महासचिव हेमन्त बुढाथोकीमगरले जानकारी दिनुभयो ।
लखन थापाका समर्थक तथा शुभेच्छुकहरुले शुक्रबार नै खुलामञ्चबाट जुलुस निकालेका थिए । सो जुलुस शहीद गेट पुगेर कोणसभामा परिणत भएको थियो ।
कोणसभालाई नेपाल मगर संघका पूर्व अध्यक्षहरु गोरेबहादुर खपांगीमगर र यमबहादुर बुढाथोकीमगर तथा पूर्व उपाध्यक्ष बमकुमारी बुढामगर र नेपाल मगर विद्यार्थी संघका महासचिव हेमन्त बुढाथोकीमगरले पनि सम्बोधन गर्नुभएको थियो ।
शहीद गेटमा राखिएको लखन थापाको तस्वीर प्रहरीले हटाउन लाग्दा केहीबेर लखन थापाका शुभेच्छुक र प्रहरीबीच झडप पनि भएको थियो । झडपपछि प्रहरी तस्वीर हटाउन नसकी फर्किएको महासचिव बुढाथोकीमगरले बताउनुभयो ।
लखन थापाले जहानियाँ राणाशासनका विरुद्ध पहिलोपटक संगठित विद्रोह गरेका थिए । वि.सं. १९३३ फागुन २ गते जंगबहादुर राणाको आदेशमा लखन थापा मारिएका थिए ।
उनका शुभेच्छुकहरुले उनलाई प्रथम शहीद घोषणा गर्न माग गर्दै आएका छन् । सोही माग गर्दै नेपाल मगर संघ तथा नेपाल मगर विद्यार्थी संघले शुक्रबारै देशभरका जिल्ला प्रसाशन कार्यालयमा ज्ञापन पत्र पनि बुझाएका छन् ।
नेपाल मगर संघका महासचिव वसन्त घर्तीमगरको नेतृत्वमा गएको मगर संघ संस्थाका प्रतिनिधि टोलीले शुक्रबार नै प्रधानमन्त्री पुष्पकमल दाहाल प्रचण्डलाई भेटी लखन थापालाई प्रथम शहीद घोषणा गर्न माग गर्दै ज्ञापन पत्र बुझाएको छ ।
ज्ञापनपत्र ग्रहण गर्दै प्रधानमन्त्री दाहालले लखन थापालाई प्रथम शहीद घोषणा गर्ने मागप्रति आफू सकारात्मक रहेको बताउनुभएको प्रतिनिधि टोलीका सदस्य नेपाल मगर विद्यार्थी संघका अध्यक्ष भोजविक्रम बुढामगरले बताउनुभयो ।