लोडसेडिङका फाइदा

जब हिउँद शुरु हुन्छ तब धेरै पक्ष र पाटा परिवर्तन हुन्छन् । गर्मी हट्छ, जाडो बढ्छ । दिन छोटि्टन्छ, रात तन्किन्छ । अरुबेला मात्तिएर सामुन्ने बसेकाको नाकको डाँडीनिरै ठडिने हात खल्तीभित्र लुक्छन् । प्रकृतिका यस्ता नियमितता भित्र नेपालमा केही सालयता नयाँ उपहार थपिएको छ । नेपालमा मौसम परिवर्तन भई हिउँद लागेको त्यतिबेला थाहा हुन्छ जतिबेला विद्युत आपूर्ति घट्न थाल्छ । चाड पर्व आएको महसूस त्यतिबेला हुन्छ जतिबेला बिजुली जाँदैन । बर्खा लागेको त्यतिबेला चाल पाइन्छ जतिबेला लाइन कम जान थाल्छ ।
सालभरिमा लाइन कति दिन जान्छ त्यसको हिसाबकिताब बिजुली अड्डासँगै होला । भविष्य यस्तो पनि देखिन्छ कि बिजुली कहिले जान्छ भन्दा पनि बिजुली कहिले आउँछ भनेर औँला भाँच्न परोस् । प्रविधिले मानिसलाई यान्त्रिकीकरणको चेपोमा हालिसकेको छ । अब मान्छे भएर केही काम छैन, मानिसहरू बेरोजगार हुन्छन् यदि बिजुली छैन भने । उद्योग कलकारखाना त परको कुरा । बिजुली छैन भात पाक्दैन । बिजुली छैन लुगाको मैला पखालिन्न । बिजुली छैन जीवन छैन । बिजुली छैन केही छैन ।
तर बिजुली नहुँदा बेफाइदाको ठेली मात्र थपिँदो रहेनछ । फाइदा पनि हुँदो रहेछ । त्यसो त नकारात्मक फाइदाको चाङ पनि हुवात्तै बढाउँछ लोडसेडिङले । कार्यालय सहायक -आजकल पियन भन्न पाइन्न) लाई हाकिमलाई चिया पकाउनै परेन । फोटोकपी गर्न परेन । कर्मचारीलाई आजको काम भोलि सार्ने बहाना सजिलो भो । छिटोछिटो कार्यालयबाट टाप कस्न पाइयो । समयमा काम फत्ते गर्न नसक्ने भोलिवादीहरूलाई ढुङ्गा खोज्दा द्यौता मिल्यो । काम थाल्नै बिर्सिरहेको बेलामा भन्न पाइयो - हेर्नुस् न काम सक्न अलिकति बाँकी थियो बत्ती गएर तुर्नै पाइएको छैन ।
त्यस्तो त धेरैलाई थाहा छ - बत्ती जाँदा चोरको पेशा अङ्गाल्नेको खुदो पल्टन्छ । सुरक्षाकर्मीलाई पनि बत्ती गएको बेला चोर आउन सक्छ आफनो सुरक्षा आफैँ गर्नु भन्यो, पञ्छियो । नभन्दै यही हप्ता यस पंक्तिकारको डेरासँगै जोडिएको घरमा पहिलो तल्लामाथि उक्लेरै चोरले पुगनपुग ३० हजारको नगद र मालताल कुम्ल्याएछ । मेरी एउटी मित्र छिन् जो बढी सुत्ने विधामा विश्व रेकर्ड राख्छुजस्तो गर्छिन् । उनी जस्ता कुम्भकर्णलाई पनि लोडसेडिङले अनुकूल बनाएकै होला । लोडसेडिङले मैनबत्ती, टुकीमारा, लालटिन, इमरजेन्सी लाइट, ब्याट्री, टर्चलाइट बेपारीलाई पनि सकत् फाइदा दिएकै छ । यसरी फाइदा लिनेको सूचीमा यो पंक्तिकार पनि छ । तर पंक्तिकार माथि उल्लिखित पेशामा भने आवद्ध छैन । ऊ न चोर हो, न सुताहा हो, न बैकल्पिक बत्ती बेपारी नै ।
बत्ती नभएको मौकामा मैनबत्तीको घुर्मैलो उज्यालो मुनी बसेर -कहिले सुतेर पनि) पंक्तिकारले चार दिनमा तीन वटा किताब छिचोल्यो । जनयुद्धका नायकहरू भन्ने त एकै बसाईमा खर्लप्पै पार्‍यो । प्रचण्डः एक अज्ञात विद्रोही, अब यस्तो कहिल्यै नहोस् सिध्याउन चाहिँ तीन दिन लगायो । त्यही समयमा काखे कम्प्युटरको सहयोग लिई दुइ वटा प्रस्ताव पनि तयार पार्‍यो । ब्लग र फेसबुकका सामग्री पनि यही मेसोमा तयार भए । बत्ती भएको भए यो समय टेलिभिजनको च्यानल तलमाथि गरेरै बित्ने थियो । भएन त काइदा -
आज दिउँसो अड्डामा एक सहकर्मीले लोडसेडिङको अर्को पनि फाइदा सुनाउनुभयो । उपत्यकामा घर ठड्याउन भ्याएका ती मित्रको भनाइ थियो - बत्ती जानाले मेरो घरको पानी ट्याङकी भरिन थालेको छ । अरुबेला छिमेकीले हाइपावरको मोटर चलाए पछि गहिरोमा भए पनि उनको ट्याङ्कीमा पानी तुर्किनै पाउँदैनथ्यो रे । भएन त फाइदा -
तपाईसित पनि लोडसेडिङबाट फाइदा लुट्ने कुनै काइदा छ भने आउनुस् आमोदप्रमोद गरौँ । बत्ती गएर बर्बाद भयो भनेर तालुमा हाल राख्ने होइन अब प्रतिकूलतामा अनुकूलता पहिल्याउन सिकौँ। लोडसेडिङबाट लाभ लिन सिकौँ, सकौँ । जलस्रोतमा विश्वको दोस्रो धनी हाम्रो देश -सधैँ रहिरहोस् । लोडसेडिङ -जिन्दावाद । लोडसेडिङ हामीलाई -प्राणभन्दा प्यारो छ ।